انتظار

تیز بارش ہو رہی تھی۔ آفس سے نکلتے ہی میں نے اِدھراُدھر نگاہ ڈالی توپارکنگ سے منسلک بس سٹاپ پر تم مجھے نظر آئ۔ بھیگی بلی کی طرح ایک کونے میں سکڑی سمٹی کھڑی تم بہت ہی حسین لگ رہی تھی۔  نہ چاہتے ہوے بھی میرے قدم تمھاری سمت بڑھنے لگے۔ تمھارے ساتھ کھڑے ھوتے ہی میں نے پوری چھتری تمھارے اُوپر کر دی اور خود بارش میں بھیگنے لگا۔ تم چپ چاپ میرے ساتھ کھڑی رہی۔ تمھاری سانسں مجھے اپنی سانسوں میں ڈھلتی محسوس ہونے لگی۔ وقت جیسے تھم سا گیا۔  سامنے ایک بس آکر رکی۔ تم نے اپنا قدم آگے بڑھایا اورمیں اچانک ہوش میں آگیا۔ تمھارے وجود کا طلسم تمھاری خوشبو کے حسار سے نکلتے ہی ٹوٹ گیا۔ بس کے پایئدان پر قدم جماتے ہی  مڑ کر تم نے مجھے دیکھا اوراسی ایک لمحے میں اپنی ساری ذندگی میں نے تمھارے پیار کے نام انتساب کرڈالی۔ 

اگلے روز وقتِ مقر ر پر اپنی جگہ جا پہنچا۔ تھوڑی دیر بعد تم بھی آ گئ۔ آنکھوں کی زباں نے حالِ دل بیان کیا اور تم اپنی بس میں سوار ہو گئ۔ بس کی کھڑکی میں سے سر موڑے بغیر تم نے کن آنکھیوں سے مجھ پر ایک نگاہ ڈالی۔ تمھارے ہونٹوں پر پھیلی مسکراہٹ نے میرے اوسان خطا کر دیے۔ میرا دائیں ہاتھ ہوا میں اٹھا اورکسی خودکارنظام کے تحت تمہیں ٹاٹا کرنے لگا۔ اپنے ہونٹوں پر آئ ھنسی کو سرکتے آنچل سے چُھپاتے ہوے تم نے بھی کسی جادوآئ دیس کی شہزادی کی طرح ہلکا سا ہاتھ ہلا دیا اور میں بیہوش ہوتے ہوتے بچا۔

وہ ساری رات تمھارےسپنے دیکھتے گزاری۔ دل میں پکا ارادہ کیا کہ کل تم سے بات کروں گا اور تمھارا نمبر لے لوں گا ۔ صبح آفس جاتے ہی پتا چلا کہ پورٹ قاسم پر کمپنی کے نام آئے سامان کی کلیئرینس میں کچھ مسئلہ ہے اس لئے فورا کراچی جانا پڑا۔ کام تو ہو گیا لیکن پورا ہفتہ لگ گیا۔ وہ سات دن سات صدیوں سے کم نہ تھے۔ ایک ایک منٹ گِن کر گزارا۔ ہر وقت یہی خیال جان کھائے جاتا تھا کہ تم کیا سوچتی ہو گی کہ میں کہاں گیا۔ اور پھر یہ سوچ کر کہ تم مجھے کتنا مس کر رہی  ہو گی میرے دل کی دھڑکن بےترتیب ہو جاتی۔ میں جا نتا تھا کہ تمھا ری نگائیں مجھے بس سٹاپ پر تلاش کرتی ہوں گی اور انجانے چہروں سے میرے مطعلق سوال کرتی ہوں گی۔

میں واپس لاھور آچکا تھا۔ چھٹی کے وقت سے آدھ گھنٹہ پہلےہی میں بس سٹاپ پر پہنچ گیا اور تمھارے انتظار میں آسمان پر اڑتے پرندے گننے لگا۔ اتنے میں یوں محسوس ہُوا کہ تم آرہی ہو۔ فورا اپنی بائیں سمت دیکھا تو میں سانس لینا بھول گیا۔ تم کسی اپسرا کی مانند دھیرےدھیرے ھواکے دوش پہ چلی آ رہی تھی۔  تمھاری نظر جونہی مجھ پر پڑی توتم نےایک اَدائےِ بےنیازی سے اپنا چہرہ دوسری طرف کر لیا​۔ تمھاری آنکھوں میں مجھے بہت سارا کرب اورتھوڑا سا غصہ دیکھائ دیا۔ میں نےفوری فیصلہ کیا کہ آج میں تمھارے سارے گلے شکوے دور کر دوں گا۔ یہی سوچ کر میں نے تمھاری طرف اپنا پہلا قدم بڑھایا ہی تھا کہ تمھارے سامنے ایک موٹرسائیکل آکر کھڑی ہو گئ ۔ تم اُچک کرموٹرسائیکل پر سوار نوجوان کے پیچھے بیٹھ گئ۔ موٹرسائیکل کے چلتے ہی تم نے پوری گردن موڑ کر مجھ پرفخریہ نگاہ ڈالی اور میرے سپنوں کا بت زمیں بوس ہوگیا۔ دنیا اور مافیا سے بےخبرتھکےتھکےبوجھل قدم اٹھاتےمیں پارکنگ میں کھڑی اپنی مرسیڈیز کی جانب چل پڑا.

Written By: Nadeem Alam

Other short stories by same author:

Click 👇

Tere Dar Per Sanam
Qeemat
Intezar
Love Story 2018

My Million Little Pieces

Cinderella

The Missing Bride

The Devil

My World